Sorkarin a um darh hnuah Khan-a party miten lungawi lohna lantir titawp

Sorkarin a um darh hnuah Khan-a
party miten lungawi lohna lantir titawp
Pakistan-a prime minister hlui, Imran Khan-a kaihhruai eptu party miten an khawpui, Islamabad-a lungawi lohna an lantir chu Nilainia sorkarin an zinga mi eng emaw zat an man hnuah an tawpsan ta.
‘Dan leh thupek kengkawhtuten Islamabad-a an hmunpui ber an thian fai tawh’ tiin interior ministry chuan Nilaini zingah khan thu a chhuah a ni.
Khan-a party hruaitu lawk tak tak, a nupui, Bushra Bibi leh Ali Amin Gandapur telin, he lungawi lohna hi an hruai a. Anni hi man lohvin an chhuak thei hram niin Interior Minister Mohsin Naqvi chuan thuthar lakhawmtute a hrilh.
Pakistan Tehreek-e-Insaf (PTI) MP Atif Khan-a chuan ‘rawng taka an laka sorkar a chet avangin’ an thil phut nawrna an kalpui chu an titawp ta rih tih a sawi.
Pathianni atanga PTI mite inhawr khawm tanah hian venhim hna thawktu pali telin mi paruk an thi a, an rama an sumdawnna hmunpui ber an tibuai hman hle.
Khan-a tantute hi Islamabad-ah luh an tum a, Prime Minister Shehbaz Sharif-a sorkarin danna tura siamte chu paltlang luiin police nen an innawr nasa hman hle.
Mipuite hi Thawhlehni khan Red Zone an tihah an awm khawm a, an party chuan sorkarin an thil phut, Khan-a lung in atanga a chhuah hma chu sit-in demonstration neih an tum tih an puang.
Cricket star thin, Khan-a hi kum 2022 thleng, kum li chuang prime minister a nih chhungin ei ruk leh thuneihna hmansual thubuai 150 chuang neiin lung in a tang mek.
Tun tuma PTI miten lungawi lohna an lantir hi February-a an inthlan hnua Sharif-a kaihhruai tangrual sorkarin politics thila thil a hmachhawn lian ber a la ni a. Prime minister hian heng lungawi lote hian an ram eibar dinhmun chhe tak chawi kan tuma hma an lak mekna chu a tithuanawp niin a puh nghe nghe.